Apple өнгөрсөн онд "Apple Fitness+" гэх цахим фитнесийн апликейшн гаргасан нь тус оны бас нэг томоохон нээлт болоод байна. 2020 оны 12 сарын 14-нд нээлтээ хийсэн бөгөөд iPhone, iPad, Apple TV зэрэг ухаалаг төхөөрөмжүүд дээр интернет ашиглан та хүссэн үедээ 10 төрлийн хамгийн өргөн ашиглагддаг дасгалуудыг мэргэжлийн дасгалжуулагчдын заавраар хийх боломжтой. Олон төрөлт фитнессийн дасгалууд, хүчний, йога, бүжиг, дугуй, алхалт зэрэг таны сонгож болох олон төрлийн дасгалууд багтсан байгаа. Та дасгалаа сонгохоос гадна хугацаа болон дасгалуудын хэмийг тааруулж ачаалал хэр авах хүсэлтэй байгаагаа сонгох боломжтой. Дасгалжуулагчдын хувьд тухайн салбарт тэргүүлэх зэрэглэлийн мэргэжилтнүүдийг сонгосон бөгөөд энэ нь богино хугацаанд асар их амжилт олсны нэгэн томоохон шалтгаан юм. Mөн алдартай хамтлаг дуучдын уран бүтээлүүд таныг дасгал хийх хугацаанд урам зориг өгөн хамт байх болно. Apple fitness+ нь iOS 14.3, watchOS 7.2, iPadOS 14.3, and tvOS 14.3-аас хойш гарсан үйлдлийн системүүд шаардагддаг байгаа.
Үнийн хувьд та сард $9.99, жилд $79.99 төлөөд гэр бүлийнхээ зургаан гишүүнтэй хамтран ашиглах боломжтой гэдэг нь маш том давуу тал юм.
