Өнгөрсөн долоо хоногийн технологийн ертөнцийн гол сэдэв Лхагва гаригт болж өнгөрсөн Google I/O арга хэмжээ байлаа. 2 цагийн турш болж өнгөрсөн энэхүү арга хэмжээнд тэд олон төрлийн шинээр хөгжүүлж буй бүтээгдэхүүнүүдээ танилцууллаа.

AR Glass

Арга хэмжээнийхээ төгсгөлд Google харилцан яриаг шууд орчуулах чадамж бүхий AR нүдний шилээ танилцууллаа. Одоогоор хэзээ худалдаанд гарах нь тодорхойгүй байгаа ч тэд AR технологиор Meta, Snap компаниудтай хүчтэй өрсөлдөхөөр төлөвлөж байгаа нь энэ юм. 

Google Pixel Watch 

Google Pixel Watch буюу анхны Pixel ухаалаг цаг ирэх намар худалдаанд гаргахаа зарласан нь онцлох мэдээ байлаа. Wear OS 3 системийн шинэчилсэн үйлдэлд суурилсан энэхүү цаг нь Fitbit-тэй бүрэн нийцэж ажиллах ба эрүүл мэндийн хэмжилтүүдээ бугуйнаасаа бүрэн хянах боломжийг олгоно. Гол функцүүдээ танилцуулсан хэдий ч үнэ болон ямар чиптэй байх нь одоогоор тодорхойгүй байгаа юм.

Pixel Buds Pro 

Тэд Airpod Pro-той өрсөлдөхүйц бүтээгдэхүүн болох Pixel Buds Pro-г 199 ам.долларын үнээр танилцууллаа. Дуу чимээ тусгаарлагч, 7 цагийн туршид ажиллах баттерей, Bluetooth холболтоор 2 төхөөрөмжид зэрэг холбогдох боломжтой зэрэг онцлогтой чихэвч нь бусад ижил төрлийн бүтээгдэхүүнээс ихээхэн давуу талыг олгоно гэж Google-ийнхэн үзэж байна. Улаан, хар, ногоон зэрэг өнгөний сонголтуудтай чихэвчийг 2022 оны 7-р сарын 21-ны өдрөөс урьдчилсан захиалгаар худалдан авч болохнээ.

Tensor powered tablet 

Нэг хэсэг таблетны зах зээл уналттай байсан хэдий ч Google таблетнууддаа эргэн анхаарлаа хандуулж эхэллээ. Tensor чиптэй, Андройд 12L системтэй дараагийн таблет илүү том дэлгэцтэйгээр эргэн ирэхнээ.